Jioએ રજૂ કરી ‘Making of JioPhone Next’ ફિલ્મ, સામે આવ્યા ફોનના ખાસ ફીચર્સ


હાઈલાઈટ્સ:

  • દિવાળી પહેલા લોન્ચ કરવામાં આવશે JioPhone Next સ્માર્ટફોન.
  • કંપનીએ Making of JioPhone Next નામનો વીડિયો શેર કર્યો.
  • વીડિયોમાં ફોનના ફીચર્સ, કંપનીના વિઝનની જાણકારી આપવામાં આવી.

દિવાળી પહેલા મુકેશ અંબાણીની માલિકીની કંપની રિલાયન્સ જિયો એક ફોન લોન્ચ કરવાની છે, જેનું નામ હશે જિયો ફોન નેક્સ્ટ. કંપનીનો દાવો છે કે, દેશભરમાં તમામ લોકોને ડિજિટલ કનેક્ટિવિટી મળી રહે તે માટે આ ફોન વિકસાવવામાં આવ્યો છે. જિયો ફોન નેક્સ્ટ બનાવવા માટે કંપનીએ ગૂગલ અને ક્વોલકોમ સાથે ભાગીદારી કરી છે. કંપની દિવાળી પહેલા જ આ ફોન લોન્ચ કરવાની છે, ત્યારે લોકોમાં આતુરતા છે અને અનેક પ્રશ્નો પણ થઈ રહ્યા છે. ફોનની કિંમત શું હશે, ફીચર્સ કયા હશે, કેમેરા ક્વોલિટી કેવી હશે? વગેરે વગેરે. લોકોના આ પ્રશ્નોના ઉત્તર આપવા માટે જિયોએ એક ફિલ્મ રજૂ કરી છે, જેનું નામ છે- મેકિંગ ઓફ જિયોફોન નેક્સ્ટ.

આ વીડિયોમાં દર્શાવવામાં આવ્યું છે કે કઈ રીતે આ ફોનનું નિર્માણ કરવામાં આવ્યું છે. પાછલા થોડા વર્ષોમાં જિયોને ઘણી લોકપ્રિયતા મળી છે. જિયોના અત્યારે 430 મિલિયન યુઝર્સ છે. રિલાયન્સ ઈન્ડસ્ટ્રીના ચેરમેન મુકેશ અંબાણી જિયોને હજી આગળ લઈ જવા માંગે છે. વીડિયોમાં કંપનીના મિશન અને વિઝનને પણ દર્શાવવામાં આવ્યા છે. વીડિયોમાં દર્શાવવામાં આવ્યું છે કે આ ફોન ભારતમાં બનાવવામાં આવ્યો છે, ભારતીયો માટે અને ભારતીયો દ્વારા તૈયાર કરવામાં આવ્યો છે.

કંપની સુનિશ્ચિત કરવા માંગે છે કે ડિજિટલ ટેક્નોલોજીનો ઉપયોગ કરવા માટે દરેક ભારતીયને એકસમાન તક મળે. દેશના દરેક વર્ગના લોકોને ડિજિટલ ટેક્નોલોજીની પહોંચ હોવી જોઈએ. વીડિયોમાં દર્શાવવામાં આવ્યું છે કે, જિયો ફોન નેક્સ્ટને કારણે લાખો ભારતીયોનું જીવન બદલાઈ જશે. વીડિયોમાં ફોનના અનેક ફીચર્સ પણ સામે આવ્યા છે. આ ફોનની ઓપરેટિંગ સિસ્ટમ ખાસ હશે જે એન્ડ્રોઈડ દ્વારા ભારતીય યુઝર્સ માટે ખાસ તૈયાર કરવામાં આવી છે. જિયો અને ગૂગલની ટીમ દ્વારા સાથે મળીને ઓપરેટિંગ સિસ્ટમ વિકસાવી છે, જે કિંમતમાં પણ વ્યાજબી છે.

વીડિયોમાં પ્રોસેસર વિષે પણ વાત કરવામાં આવી છે. આ ફોનનું પ્રોસેસર ક્વોલકોમ દ્વારા તૈયાર કરવામાં આવ્યું છે. આ પ્રોસેસરને કારણે ઓડિયોની ગુણવત્તા સુધરશે, બેટરી લાઈફ વધશે અને કનેક્ટિવિટી અને લોકેશન ટેક્નોલોજી પર પણ ધ્યાન કેન્દ્રિત કરવામાં આવ્યું છે. ફોનમાં વોઈસ આસિસ્ટન્ટ ટેક્નોલોજીનો ઉપયોગ કરવામાં આવ્યો છે, જેનાથી તમે પોતાને અનુકૂળ હોય તે ભાષામાં ઈન્ટરનેટ પરથી માહિતી મેળવી શકો છો. આ સિવાય Listen નામનું ફંક્શન આપવામાં આવ્યું છે, જેનો ઉપયોગ કરીને યુઝર સ્ક્રીન ઉપર ઉપલબ્ધ કન્ટેન્ટ વાંચી શકે છે. Translate ફંક્શન યુઝરને સ્ક્રીન પર ઉપલબ્ધ કન્ટેન્ટને પોતે પસંદ કરેલી ભાષામાં અનુવાદ કરીને આપશે.

આજકાલ ફોન ખરીદતી વખતે લોકો કેમેરાને ખાસ ધ્યાનમાં લેતા હોય છે. જિયો નેક્સ્ટ ફોનમાં કેમેરા ફીચર્સ પણ રસપ્રદ આપવામાં આવ્યા છે, જેમ કે પોટ્રેઈટ મોડ, નાઈડ મોડ, વગેરે. આ સિવાય ઈન્ડિયન ઓગમેન્ટેડ રિયાલિટીના ફિલ્ટર્સ પણ આપવામાં આવ્યા છે. એપ્સની વાત કરીએ તો ફોનમાં જિયો અને ગૂગલની પ્રિલોડેડ એપ્સ સાથે જ આવશે. આ સિવાય ફોનમાં ઓટોમેટિક સોફ્ટવેર અપડેટ સિસ્ટમ આપવામાં આવી છે. માટે નવા અપડેટ્સનો લાભ યુઝર્સ સરળતાથી મેળવી શકશે.

About: k


Leave a Reply

Your email address will not be published. Required fields are marked *